حوار بين زوجين

[رســـــــال]

المشهد رغم الكوميديا اللي فيه الا انه مفيد جدا لحل المشاكل الأسرية وده اللي اتقال ف المشهد :-

- ‏انا عايزة اتطلق

- حاضر

- إيه بقا حاضر دي إن شاء الله

- حاضر يعني حاضر .. هطلقك .. إيه اللي مش مفهوم ف كلامي ؟

- مش عايز تعرف عايز اتطلق ليه ؟

- واعرف ليه .. اكيد عندك اسبابك المنطقية اللي تخليكي تطلبي الطلاق .. انتي مش صغيرة وعارفة مصلحتك

‏- يعني ايه بقا مش صغيرة دي .. لأ يا حبيبي أنا لسه صغيرة ونص . اتكلم عن نفسك انت

- خلاص انتي صغيرة وعارفة مصلحتك

- صغيرة في السن بس عقلي كبير وفاهمة

- اكيد يا حبيبتي

- هتطلقني إمتى بقا ؟

- بعد ما ارجع من الشغل

- وهتعمل إيه ف الولاد ؟

- زي ما انتي عايزة .

- مش زي ما انا عايزة .. زي قانون الأسرة
‏الجديد ما بيقول .. العيال هيفضلوا معايا لحد ما يتموا ١٨ سنة

- ماشي .. ولو عايزاهم على طول براحتك

- طبعا .. عايز تخلص منهم عشان تتصرمح وتروح تتجوز وانا اللي افضل موقفة حياتي ف تربيتهم .

- خلاص هاخدهم اربيهم واتصرمحي انتي واتجوزي

- لا يا حبيبي .. الصرمحة ليها ناسها.. ومش
‏هتلوي دراعي بالعيال وهاخدهم غصب عنك

- حاضر

- وهاخد الشقة زي ما القانون بيقول

- ماشي

- طبعا .. ما إنت هتسيبهالي خرابة وتروح تجيبلك شقة نضيفة .. ما اهو أنا وعيالك مش مهمين عندك

- مهمين طبعا

- طبعا والنفقة هاخدها غصب عنك

- أساسي

- وهنقل الولاد ف مدارس إنترناشيونال وهتدفع مصاريفها

‏- أحسن برضوا

- والعربية

- تحت أمرك خديها

- تقدر تقولي هتقعد فين بقا بعد الطلاق ؟

- هتصرف .. ماتشغليش بالك

- وأشغل بالي ليه .. ما إنت هتسيبني معكوكة مع عيالك وتروح انت تروق دماغك ف اي حتة

- ربنا يسهل

- طب إيه رأيك بقا إننا هنتطلق وهتقعد معانا هنا .. ما أنا مش هشيل الطين كله لوحدي

‏- حاضر . بعد.اذنك .

- قايم رايح فين ؟

- الحمام

- اعمل حسابك لو قطعت شرايينك بالموس زي كل مرة هنكد عليك عيشتك .. أنا مش مستعدة ابقا ارملة وكل من هب ودب يجيب ف سيرتي

- انتحر واسيب الكيكة اللي بتعمليها اللي تجنن دي لمين ؟

- بجد عجبتك ؟

- دي تحفة

- بس حاساها هبطانة وناشفة وسكرها كتير ومش عاجباك

‏- إوعي تقولي كده .. دي أحلى كيكة دوقتها ف حياتي .. خشي هاتيلي منها

- ماشي وهعملك جنبها فنجان قهوة يعدل مزاجك

- تسلميلي ياقلبي
https://blogger.googleusercontent.com/img/b/R29vZ2xl/AVvXsEhkB6cxa4VEEGSEQfElUP3eExpcHfx8FJVY8CDzDgmG29 BXd7brDjyfhbb0mUSZ1gpXjg1vvkGnAHu4kbV4OiRy5wabHvvy FGTQGAr5hcFnStZTV5VfKSzmaCxLXMEScfBgKlDlwhuFjTrzu6 s-jdwRqX0ThFebxc2tP6GK6Wwjojp5_Rrpk-TvTqsO6Vg/s480/%D8%AD%D9%88%D8%A7%D8%B1.jpg