مقروط الكوشة يذوب في الفم
 

السلام عليكم ورحمة الله وبركاته
مقروط الكوشة يذوب في الفم
المقادير:
2كيلات سميد متوسط( خاص بالمقروط)
كيلة فرينة مغربلة
مغرفة صغيرة خميرة الحلويات
رشة الملح
مغرفة صغيرة سكر
كيلة غير ربع مرغرين او زبدة وتكملي الباقي زيت
كيلة (نصف كيلة ماء ونصف كيلة ماء زهر)
الحشو:
تمر ( الغرس) مفور ومنقي مليح وشويه زبدة ورشة حليب وقرنفل مرحي وجلجلان مقلي
طريقة التحضير:
نبسس السميد والفرينة بالزبدة او المرغرين والزيت مليح نضيف رشة الملح ومغرفة صغيرة خميرة الحلويات ومغرفة صغيرة سكر ونخليه يرتاح من 1 الى6 ساعات....او حتى ليلة كاملة
بعد ما يرتاح الخليط نلمو بماء وماء الزهر وهنا نضيفو الماء بالتدريج لانو كاين سميد او فرين يتشربو الماء وكاين ليميتشربش على حساب نوعية السميد والفرينة ...(ومن الاحسن تجربي شوي من السميد تشربيه باه تعرفي يتشرب ولا ميتشربش) ونلمو غير باطراف الاصابع من غير ما نضغط عليه....نخليه يرتاح شويه حوالي 10 دقائ بدون ان ننسى نغطيه بكيس بلاستيكي وهو يرتاح لانك كي ممتغطهيش وهو يرتاح راح يتشقق لما يكون يطيب
و نلم لعجين مليح بدون الضغط او العجن ونشكول بالمول الخاص بيه ونخليه يرتاح حتى ساعة او اكثر وبعدها نطيبو في الفرن المسخن مسبقا على درجة 180درجة ونخليه حتى يتحمر من الجوانب ويتغير لونوالى الاصفر الذهبي وبعدها نشعل عليه من الفوق باه يتحمر وياخذ اللون الذهبي المحمر مدة الطهي انتاعو تستغرق من 30 الى45 على حساب نوعية الفرن ودرجة السخونية انتاعو.
بعد ما يطيب نخرجو ونرميه وهو سخون في لعسل البارد بدون مانضيف للعسل ماء الزهر لانو راح يخليه يطرى من بعد......الا في حالة كنتي راح تقدميه في نفس اليوم معليش تزيدي للعسل ماء الزهر....اما اذا كنتي راح تحتفضي بيه مدة طويلة من الاحسن تعسليه في لعسل وحدو....لان العسل يعتبر كمادة حافظة ميفسدش جررربوه.